Эцэг дээдэс маань 30 жилийн дотор дэлхийн түүхийг өөрчилсөн шиг, эх орон минь 30 жилийн дотор нийгмийн хөгжил, эдийн засгийн өсөлт, иргэдийн амьдралын чанараар бүс нутагтаа тэргүүлсэн, Азийн их хүлэг улс болон хөгжин мандах болтугай!

Монгол Улсын Ерөнхий Сайд

Монгол Ардын Намын Дарга

Лувсаннамсрайн Оюун-Эрдэнэ

Он цагийн хэлхээс

2016 он

36 НАСАНДАА УИХ-ЫН ГИШҮҮНЭЭР СОНГОГДОВ

УИХ-ын сонгуулийн 41 дүгээр тойрог,  Хэнтий аймагт МАН-аас нэр дэвшсэн Лувсаннамсрайн Оюун-Эрдэнэ сонгогчдын 53.2% буюу 6,232 иргэний саналаар 36 настайдаа УИХ-ын гишүүн болов. Түүнчлэн Хэнтий аймгийн Нутгийн зөвлөлийн тэргүүлэгчдийн ээлжит хурлаар Хэнтий аймгийн Нутгийн зөвлөлийн даргаар томилогдов.

2019 он

МОНГОЛ УЛСЫН САЙД, ЗГХЭГ-ЫН ДАРГААР ТОМИЛОГДЛОО

УИХ-ын чуулганы 2019 оны 02 дугаар сарын 02-ны өдрийн нэгдсэн хуралдаанаар Монгол Улсын сайд, Засгийн газрын Хэрэг эрхлэх газрын даргаар томилогдов.

2020 он

УИХ-ЫН ГИШҮҮНЭЭР УЛИРАН СОНГОГДОВ

Монгол Улсын Их хурлын найм дахь удаагийн сонгуулиар 18 дугаар тойргоос Л.Оюун-Эрдэнэ хоёр дахь удаагаа парламентын гишүүнээр сонгогдсон юм.

2020 он

"АЛСЫН ХАРАА-2050" ХӨТӨЛБӨРИЙГ САНААЧИЛЖ, УИХ-ААР БАТЛУУЛАВ

Монгол Улсын өнгөрсөн 30 жилийн хөгжлийн үе шатуудад дүгнэлт хийх, 2050 он хүртэлх урт болон дунд хугацааны хөгжлийн бодлогыг тодорхойлох баримт бичиг боловсруулах ажлын хэсгийг Засгийн газраас байгуулав. Тус ажлын хэсгийг УИХ-ын гишүүн, ЗГХЭГ-ын дарга Л.Оюун-Эрдэнэ ахалж, гишүүдээр нь салбар бүрийн эрдэмтэн, судлаач, яам, агентлагийн удирдлага, их, дээд сургууль, төрийн бус байгууллагын төлөөлөл зэрэг 1,500 орчим хүн ажиллав.

Улсын Их Хурлын чуулганы 2020 оны 05 дугаар сарын 13-ны өдрийн нэгдсэн хуралдаанаар “Алсын хараа-2050” Монгол Улсын урт хугацааны хөгжлийн бодлогыг баталсан юм.

2021 он

МОНГОЛ УЛСЫН 32 ДАХЬ ЕРӨНХИЙ САЙДААР ТОМИЛОГДЛОО

УИХ-ын гишүүн, ЗГХЭГ-ын дарга Л.Оюун-Эрдэнийг парламентын гишүүдийн 87.9 хувийн саналаар Монгол Улсын 32 дахь Ерөнхий сайдаар томилов. Ингэснээр тэрбээр Монгол Улсын хамгийн залуу Ерөнхий сайд нарын  нэг болов.

2021 он

МОНГОЛ АРДЫН НАМЫН ДАРГААР СОНГОГДЛОО

Монгол Ардын Намын XXX Их хуралд оролцсон нийт төлөөлөгчдийн 99.7% нь дэмжиж Л.Оюун-Эрдэнэ МАН-ын дарга болов. Тэрбээр 2009 онд МАН-ын Удирдах Зөвлөлийн Хэрэг эрхлэх газрын дарга, 2010-2014 онд Нийгмийн Ардчилал, Монголын Залуучуудын холбооны Ерөнхийлөгч, 2011 он МАН-ын Нарийн бичгийн дарга, 2012 онд МАН-ын Ерөнхий нарийн бичгийн даргын үүрэг гүйцэтгэгчээр ажиллаж байсан.

2021 он

“ЭРҮҮЛ МЭНДЭЭ ХАМГААЛЖ, ЭДИЙН ЗАСГАА СЭРГЭЭХ 10 ИХ НАЯДЫН ЦОГЦ ТӨЛӨВЛӨГӨӨ”-Г ЭХЛҮҮЛЭВ

Дэлхий дахинд КОВИД-19 дэгдсэний улмаас Монгол Улсын эдийн засаг 2019 онд 5.2 хувийн өсөлттэй байсан ч 2020 онд  4.6 хувийн бууралттай гарав. Засгийн газар иргэдийнхээ эрүүл мэндийг хамгаалж, эдийн засгаа сэргээх бодлого, зорилтыг 2023 он хүртэл  хэрэгжүүлэхээ Ерөнхий сайд зарласан юм.

2021-2022 он

ВАКЦИНЖУУЛАЛТЫГ АМЖИЛТТАЙ ЗОХИОН БАЙГУУЛЖ, МОНГОЛ УЛС ХИЛЭЭ НЭЭЛЭЭ

Монгол Улс цар тахлыг даван туулах хамгийн гол арга зам болох иргэдийг дархлаажуулах ажлыг 2021 оны 02 дугаар сарын 13-нд орон даяар анх эхлүүлснээс хойш жилийн дараа шар түвшинд шилжиж, олон улсад хилээ нээв. 2022 оны 3 дугаар сарын 24-ний байдлаар Монгол Улсын нийт хүн амын 67% коронавирусийн эсрэг вакцины бүрэн тунд хамрагдаад байна.

2021-2022 он

“ШИНЭ СЭРГЭЛТИЙН БОДЛОГО”

Цар тахлын үед Монгол Улсын эдийн засаг 1992 оноос хойш хоёр дахь удаагаа 4.6 хувь хүртэл агшсан. Тиймээс Ерөнхий сайд Л.Оюун-Эрдэнэ "Шинэ сэргэлтийн бодлого"-ыг  санаачилж, 2021 оны 12 дугаар сарын 30-нд УИХ-аар батлуулав. "Шинэ сэргэлтийн бодлого" нь “Алсын хараа-2050” Монгол Улсын урт хугацааны хөгжлийн бодлогыг хэрэгжүүлэхэд саад болж буй  хязгаарлагч зургаан хүчин зүйлийг 10 жилийн хугацаанд бууруулахад чиглэж байна. 

2022 он

“ОЮУ ТОЛГОЙ”-Н ӨРИЙГ ТЭГЛЭЖ, ТӨСЛИЙГ “АМЬ ОРУУЛАВ”

Ерөнхий сайд Л.Оюун-Эрдэнийн Засгийн газар “Оюу Толгой”-н хөрөнгө оруулагч талтай амжилттай хэлэлцээ хийж уг төслөөс Монгол Улсын Засгийн газрын эзэмшлийн 34 хувьд ногдох 2.3 тэрбум ам.долларын өрийг 100 хувь тэглүүллээ. Ингэснээр өмнө нь тооцоолж байсан 22 тэрбум ам.долларын өр цаашид үүсэхгүй. Мөн Засгийн газрын "Шинэ сэргэлтийн бодлого"-ын нэг хэсэг Аж үйлдвэрийн сэргэлтийн хүрээнд “Оюу Толгой”-н гүний уурхайн бүтээн байгуулалтыг 2022 оны 01 дүгээр сарын 25-нд талууд амжилттай эхлүүллээ.

Бодлогын баримт бичиг

Зургийн архив

Санал хүсэлт